Bakının Nizami rayonu, C.Naxçıvanski küçəsi, ev 50 ünvanında yerləşən bazarda Azərbaycan Qida Təhlükəsizliyi Agentliyi (AQTA) yoxlamalar keçirib. Bu haqda bu gün, 8 dekabr tarixində Bakuplus.az AQTA-ya istinadən xəbər verir.
Yoxlamalar zamanı “Nəzrin-E” MMC-yə məxsus bazarın qida təhlükəsizliyi qeydiyyatından keçmədən fəaliyyət göstərdiyi məlum olub.
Əlavə olaraq, süd və süd məhsullarının uyğun olmayan temperaturda saxlanıldığı aşkar edilib. Əlavə olaraq həmin məhsulların çirklənmədən və xarab olmadan mühafizə ediləcək şəraitdə saxlanılmadığı və üzərində etiket məlumatlarının mövcud olmadığı aşkarlanıb.
Pozuntularla bağlı bazarda süd və süd məhsullarının satışı dayandırılıb, müəssisə rəhbərliyi məsuliyyətə cəlb olunub.
