AQTA istehlakçı yoxlamalarını davam etdirir. Bu haqda BakuPlus.az qurumun mətbuat xidmətinə istinadən bu gün, 31 oktyabr tarixində xəbər verir.
28 oktyabr tarixində Azərbaycan Respublikasının Qida Təhlükəsizliyi Agentliyinin əməkdaşları tərəfindən paytaxt ərazisində qida sahəsində fəaliyyət göstərən ticarət və ictimai iaşə müəssisələrində həyata keçirilən monitorinqlər zamanı ümumilikdə 6 müəssisədə nöqsanlar müəyyən olunub.
Bu müəssisələrdə obliqat qrupuna daxil olan işçilərin ilkin və dövri tibbi müayinədən keçirilməməsi, baytarlıq şəhadətnaməsi və ya arayışı olmayan heyvan mənşəli məhsulların qəbulu ilə bağlı nöqsanlar aşkar olunub.
Məlumata əsasən, Suraxanı rayonunda “Stop” və “Ballı” marketləri, “Köz dönər”, “Şam işığı” kafeləri, Binəqədi rayonu ərazisində yerləşən “Lido” və Nizami rayonunda “Bursa” restoranlarında aşkar edilmiş nöqsanlarla bağlı qanunvericiliyin tələblərinə uyğun müvafiq tədbirlər görülüb.
