Nazirlər Kabinetinin sərnişindaşımaya dair təsdiqlədiyi yeni tələblər barəsində açıqlama verilib. Bu haqda bu gün, 30 mart tarixində Bakuplus.az Report-a istinadən xəbər verir.
Azərbaycan Yerüstü Nəqliyyat Agentliyinin (AYNA) idarə heyətinin sədri Anar Rzayevin sözlərinə görə, bunlar balanslaşdırılmış tələblərdir və bazar iştirakçılarını sürətli, keyfiyyətli transformasiyaya və yeni şərtlərə uyğunlaşdıracaq.
“Yeni qəbul olunmuş qərar bazarda taksi xidmətinin keyfiyyətini artıracaq, səfərlər taksilərdən ictimai nəqliyyata ötürüləcək. Bu, hədəflərimizdən biridir və şəhərdə tıxacın azalmasına səbəb olacaq”, – deyə AYNA rəhbəri qeyd edib.
O deyib ki, vətəndaş avtomobillə gün ərzində 2-3 səfər edirsə, taksilər 20-dən çox səfər edir. Bir taksi avtomobili 8 fərdi avtomobilə bərabərdir. 70.000 fəaliyyət göstərən taksi 550.000 avtomobilə bərabərdir. Bu səfərlər ictimai nəqliyyatla həyata keçirilə bilər.
