“Azimport” şirkətinin rəhbəri və Azərbaycan Cüdo Veteranları Assosiasiyasının prezidenti Azər Əsgərov tərəfindən hədə-qorxu ilə 500 min dollar almaqda təqsirləndirilən iş adamı Kamal Akimovun cinayət işi üzrə məhkəmə prosesi başa çatıb. Bu haqda bu gün, 24 noyabr tarixində Bakuplus.az Qafqazinfo-ya istinadən məlumat verir.
Bakı Ağır Cinayətlər Məhkəməsinin hakimi Zeynal Ağayevin sədrliyi ilə keçirilən son iclasda hökm oxunub. Hökmə əsasən, Akimovun təqsiri sübuta yetirilmədiyindən ona bəraət verilib.
İttiham aktında prokuror 11 il həbs istəyib. İttihama görə, Kamal Akimov özünə və ailəsinə zərər vuracağı ilə hədələyərək Azər Əsgərovdan 500.000 ABŞ dolları alıb.
Akimov “Hədə-qorxu ilə tələb etmə” maddəsi ilə ittiham olunub və barəsində həbs-qətimkan tədbiri seçilib.
Təqsirləndirilən şəxs ifadəsində qunahkar olmadığını, zərərçəkmişin ona böhtan atdığını bildirib. Akimovun sözlərinə görə, Əsgərovun “Azimport” şirkəti 10 il əvvəl onun Səbail rayonunda yerləşən 146 kv.m sahəsi olan binasını sökərək öz istifadəsinə götürüb.
Kamal Akimovun Silahlı Qüvvələrin Baş Qərargahının sabiq rəisi, general-polkovnik Nəcməddin Sadıkovun oğlunun biznes ortağı olduğu iddia edilir.
