Bu gün Ziya Bünyadov prospektindəki “Taxta bazarı”nda baş vermiş yanğın ərazisində yerləşən mağazalarda təqdim olunan mallar sığortalı olmayıb. Bu haqda bu gün, 23 noyabr tarixində Bakuplus.az "Azərbaycan Sığortaçılar Assosiasiyası" İctimai Birliyinə istinadən məlumat verir.
"Yanğın baş verən ərazi açıq məkan olduğu üçün burada "Daşınmaz əmlakın icbari sığortası" deyil, "Əmlakların yanğından və digər risklərdən sığortası" aktualdır. Bu sığorta növünün isə könüllü olduğunu nəzərə alsaq, bazardakı malların və materialların sığortalı olmaması sahibkarların sığortaya biganə yanaşması və yaxud sığortalanmaq üçün lazımi tələblərə riayət etməməsindən qaynaqlana bilər", – açıqlamada deyilir.
Daha öncə məlum olub ki, hadisə ilə bağlı cinayət işi açılıb. Yanğının səbəbini və dəymiş ziyanı müəyyən etmək məqsədilə yanğın-texniki və əmtəəşünaslıq ekspertizaları, bir nəfərin ölüm səbəbinin müəyyən edilməsi üçün məhkəmə-tibbi ekspertiza təyin edilib.
