Ölkəmizdə 2024-cü il “Yaşıl dünya naminə həmrəylik ili” elan edilib. Bununla bağlı bu gün, 25 dekabr tarixində Prezident İlham Əliyev müvafiq Sərəncam imzalayıb.
Sərəncamda 2030-cu ilə qədər sosial-iqtisadi inkişafa dair beş milli prioritetdən biri “Təmiz ətraf mühit və yaşıl artım ölkəsi” kimi müəyyən edilib. Həmin prioritetə uyğun olaraq, ətraf mühitin sağlamlaşdırılması, yaşıllıqların bərpası və artırılması, su ehtiyatlarından və dayanıqlı enerji mənbələrindən səmərəli istifadənin təmin edilməsi istiqamətində işlər aparılır.
Azərbaycan baza ili (1990) ilə müqayisədə 2030-cu ilə qədər istilik effekti yaradan qazların emissiyalarının 35 faiz, 2050-ci ilə qədər isə 40 faiz azaldılmasını hədəf kimi götürülüb.
Sərəncama əsasən, elanla bağlı il ərzində keçiriləcək tədbirlərin planı bir ay müddətində hazırlanıb Azərbaycan Respublikasının Prezidentinə təqdim edilməlidir.
