Bakı marketlərdə alıcılara verilən plastik torbalar yaxın günlərdə ödənişli ola bilər. Bu haqda bu gün, 3 fevral taraixində Qafqazinfo məlumat verib.
Məlumata görə, Antiinhisar Nəzarəti və İstehlak Bazarına Nəzarət Dövlət Xidməti iri ticarət şəbəkələrinə bununla bağlı məktub ünvanlayıb. Məktubda bildirilir ki, Ekologiya və Təbii Sərvətlər Nazirliyinin müraciəti əsasında qalınlığı 15-20 mikron olan polietilen paketlər kassalarda ayrı məhsul kimi satılsın. Ticərət şəbəkələri 5 gün ərzində hazırlıq işləri aparmalıdır.
Həmin məlumatı pərakəndə satış şəbəkələrinin əməkdaşları da təsdiqləyiblər. Onlar belə bir məktubun göndərildiyini və hazırda pərakəndə satış sektorunun buna hazırlaşdığını bildiriblər. Şirkətlərə fevralın 15-dək vaxt verilib və bununla bağlı hazırlığın görülməsi tapşırılıb. Plastik torbaların satış qiymətlərinə gəlincə, vahid məbləğ müəyyən edilməyib. Bu, hər bir şirkət tərəfindən müəyyən ediləcək.
Bu məlumat İqtisadiyyat Nazirliyi yanında Antiinhisar Nəzarəti və İstehlak Bazarına Nəzarət Dövlət Xidməti tərəfindən də öz təsdiqini tapıb. Qurumdan bildirilib ki, Nazirlər Kabinetinin 2021-ci ilin 2 fevral tarixli Fərmanı ilə “Azərbaycan Respublikasında ticarət, ictimai iaşə, məişət və digər xidmət növlərinin göstərilməsi Qaydaları”nda dəyişiklik edilib.
Dəyişikliyə əsasən, ticarət, ictimai iaşə, məişət və digər növ xidmətlərin göstərilməsi zamanı istehlakçılar tərəfindən malların və məhsulların daşınması üçün nəzərdə tutulan, qalınlığı 15-50 mikron olan, qulplu və qulpsuz, yüngülçəkili polietilen torbalar istehlakçılara ayrıca məhsul növü kimi təqdim edilməlidir. Əks halda vəzifəli şəxslər min manatdan min beş yüz manatadək məbləğdə, hüquqi şəxslər üç min manatdan dörd min manatadək məbləğdə cərimə ediləcəklər.
