“Azərbaycanda məişət zorakılığında ərin yaxın qohumlarının qadınlara qarşı zorakılıq faktları müşahidə edilir”, – bunu Ailə, Qadın və Uşaq Problemləri üzrə Dövlət Komitəsinin Hüquqi təminat şöbəsinin müdiri Taliyə İbrahimova deyib. Bu haqda bu gün, 21 dekabr tarixində Bakuplus.az Report-a istinadən məlumat verir.
Onun sözlərinə görə, “Məişət zorakılığının qarşısının alınması haqqında” qanuna dəyişikliklər təklif olunub. Həmin dəyişikliyə əsasən, qayınana, qayınatanın kənardan ailəyə müdaxilələri məişət zorakılığı hesab ediləcək.
İbrahimova onu da qeyd etdi ki, hazırda ölkədə boşanmaların əsas səbəblərindən biri ailələrə edilən kənar müdaxilələrdir.
“Bəzən dövlət orqanları boşanmaq istəyən tərəfləri barışdırmaq istəsə də, bu, sonda yaxşı effekt vermir. Bəzi ərazilərdə, hətta səhəri gün qətl hadisələri törədilir”, – deyə o əlavə edib.
Bununla yanaşı, İbrahimova “Məişət zorakılığının qarşısının alınması haqqında” qanuna hazırlanan dəyişiklik layihəsində həmin hissənin çıxarılmasının təklif olunduğunu söyləyib.
