Azərbaycan Respublikası Səhiyyə Nazirliyinin “Milli Hematologiya və Transfuziologiya Mərkəzi” publik hüquqi şəxsin əməkdaşları barədə cinayət işi başlanıb. Bu haqda bu gün, 18 dekabr tarixində Bakuplus.az Baş Prokurorluğun mətbuat xidmətinə istinadən məlumat verir.
Verilən məlumata görə, 2023-cü ilin fevral-may aylarında adıçəkilən tibb müəssisəsinin vəzifəli şəxsləri tərəfindən vətəndaşlara Əmək və Əhalinin Sosial Müdafiəsi Nazirliyi və Səfərbərlik və Hərbi Xidmətə Çağırış üzrə Dövlət Xidmətinin müvafiq qurumlarına təqdim etmələri üçün əlilliyin təyin olunması və hərbi xidmətdən azad olunma hüququ verən saxta arayış və sənədlər verilib.
Faktla bağlı Baş prokuror yanında Korrupsiyaya qarşı Mübarizə Baş İdarəsində cinayət işi başlanıb.
Hazırda cinayət işi üzrə istintaq təqsirkarların və onların əlbir olduqları digər şəxslərin dəqiq dairəsinin müəyyən edilməsi istiqamətində davam etdirilir
