5 noyabr şair Baba Pünhanın doğum günüdür.
Baba Pünhan 1948-ci ildə Bakının Kürdəxanı qəsəbəsində anadan olub. 1963-cü ildə orta məktəbi, 1967-ci ildə Bakı Rabitə Texnikumunu bitirib. O vaxtdan Bakı Metropolitenində mexanik işləməyə başlayıb. 1972-ci ildə ailə qurub. Bir oğlu, bir qızı dünyaya gəlib.
Metroda işlədiyi ilk vaxtlarda "Metro" qəzetində kiçik həcmli şerləri və qəzəlləri çap olunub. Sonradan bir çox qəzet və jurnallarda dərc olunan satirik şeirləri ona oxucu rəğbəti qazandırıb.
1998-ci ildə "ANS" kanalının "Qulp" verilişinə dəvət olunub. Bu verilişdə "Lirika" rubrikasında satirik qəzəllərini oxumaqla xalqın sevimlisinə çevrilib. 2000-ci ildə "Azərbaycan" jurnalı tərəfindən "Hikmət Ziya" adına mükafata layiq görülüb. Həmin ildə Azərbaycan Yazıçılar Birliyi tərəfindən satirik yazılar üzrə ilin qalibi elan olunub.
Baba Pünhanın "Acı həqiqət", "Yalan çeynəyə-çeynəyə", Mən nə dedim ki", "Kim nə götürdü" adlı kitabları işıq üzü görüb.
2004-cü il aprel ayının 17-si vəfat edib. Kürdəxanıda dəfn olunub.
