Səbail rayonunda sakinlər təhlükə altında yaşayır. Bu haqda Bakuplus.az 13 may tarixində Bizim.media-ya istinadən xəbər verir.
Hər dəfə yağış yağandan sonra Səbail rayonunun Badamdar qəsəbəsində sürüşmə aktivləşir və uzun illərdir ki, orada yaşayan sakinlərin köçürülməsi problem olaraq qalır. Bu yaxında qəsəbənin 6 metr eni olan bir küçəsində 15-20 metr məsafədə yol sürüşüb. Sakinlər bildirirlər ki, hər gün ərazidə çökmə aktivləşir və sürüşmənin əhatə dairəsi böyüyür. Sürüşmə təkcə Badamdarda deyil, Bayıl qəsəbəsində də müşahidə olunur.
Sürüşmə zonasında yaşayan sakinlərin köçürülməsi əvəzinə yeni tikililər, fərdi evlər inşa edilir. Bundan əlavə, aktivləşən sürüşməyə görə sakinlər evlərini sata bilmir.
Məsələ ilə bağlı İqtisadiyyat Nazirliyi yanında Əmlak Məsələləri Dövlət Xidmətinin mətbuat katibi Elmar Yaqubov açıqlamasında bildirib ki, tikintiyə icazə ilk növbədə yerli icra hakimiyyəti tərəfindən verilir.
“Təxminən 20-30 il əvvəlki vaxta baxsaq, həmin sürüşmə zonası olan ərazilər şam meşəsi ilə əhatə olunmuşdu. Şam ağaclarının kökü torpağın altında elə bir kök salır ki, sürüşmənin qarşısı alınır. Bu gün həmin yaşıllıqların məhv olmasına görə təbii proseslər baş verir. Bu baxımdan bu cür ərazilərdə aparılan tikintilərə birbaşa nəzarət edən qurumlar məsuliyyət daşıyırlar. Həmin ərazilər qapalı qoruq sahəsinə çevrilməlidir ki, gələcəkdə hər hansı bir vətəndaş orada tikinti işləri aparmasın”, - ekspert əlavə edib.
