Badamdar sakinləri 53 nömrəli avtobusun hərəkət istiqamətinin dəyişdirilməsindən şikayətçidir.
Bakuplus.az-a müraciət edən sakinlər bildirirlər ki, əvvəllər 53 nömrəli avtobus 20-ci sahə ilə Bayılı birləşdirən "Tarelka" adlanan ərazidən (Badamdar şossesi) keçib. Lakin bir müddətdir avtobusun hərəkət istiqaməti dəyişdirilib və 20-ci sahədən birbaşa "20 Yanvar" metrostansiyası istiqamətində hərəkət edir.
Vətəndaşlar deyirlər ki, bu dəyişiklik xüsusilə tədris ilinin başlaması ilə uşaqların məktəbə gediş-gəlişini daha da çətinləşdirəcək. Onların sözlərinə görə, 20-ci sahədən sözügedən əraziyə taksi ilə getmək təxminən 3 manata başa gəlir və hər gün bu məbləği ödəmək mümkün deyil.
Sakinlər havaların getdikcə soyuduğu və qışın yaxınlaşdığı bir vaxtda marşrutun əvvəlki istiqamətinin bərpa olunmasını istəyirlər. Onlar aidiyyəti qurumlara müraciət etdiklərini, lakin məsələnin həll olunmadığını bildiriblər.
Məsələ ilə əlaqədar Bakuplus.az əməkdaşı Azərbaycan Yerüstü Nəqliyyat Agentliyinə (AYNA) sorğu ünvanlayıb. Sorğuya cavab olaraq AYNA-dan bildirilib ki, sözügedən vəziyyət müvəqqətidir:
"Badamdar qəsəbəsi, Cavidan İbrahimli küçəsində nəqliyyat vasitələrinin hərəkətinə tətbiq edilən məhdudiyyət səbəbindən 53 nömrəli müntəzəm marşrutun nizamlı fəaliyyəti təmin olunmadığından hərəkət sxemi müvəqqəti dəyişdirilib.
Hazırda 53 nömrəli marşrut başlanğıc dayanacaq məntəqəsi "20-ci Sahə" yaşayış massivi, son dayanacaq məntəqəsi isə Abbas Mirzə Şərifzadə küçəsi (Respublika Klinik Xəstəxanası) olmaqla fəaliyyət göstərir.
Eyni zamanda, vətəndaşların ictimai nəqliyyata əlçatanlığını təmin etmək üçün 3 nömrəli müntəzəm marşrutun Badamdar qəsəbəsində hərəkəti Cavidan İbrahimli küçəsinədək ("Atilla" İdman Mərkəzi) təşkil olunur".
