Paytaxtın Nəsimi rayonu, Eldar Tağızadə küçəsində ağaclar baxımsızlıqdan quruyub. Bu haqda bu gün, 28 oktyabr tarixində Bakuplus.az ATV Xəbərə istinadən məlumat verir.
Qeyd olunan küçədə bir vaxtlar əkilən ağaclar baxımsızlıq ucbatından qurumağa başlayıb. Nəticədə vəziyyətdən çıxmaq üçün ağacların kəsilməsinə qərar verilib.
Sosial şəbəkələrdə ağacların quruması ilə bağlı məlumatlar yayıldıqdan sonra aidiyyəti qurumların nümayəndələri əraziyə cəlb olunublar. Bir neçə gün əvvəl ağaclar Yaşıllaşma Təsərrüfatı Birliyinin əməkdaşları tərəfindən budansa da, bunun heç bir faydası olmayıb. Qurudulan ağacların diblərinə asfalt döşəndiyi bildirilir.
Bakı Şəhər İcra Hakimiyyətinin Yaşıllaşma Təsərrüfatı Birliyinin baş mühəndisi Cavanşir Məmmədov bildirdi ki, ağacın dibində asfalt örtüyü olduğundan o, inkişafdan dayanmışdır. “Sınma təhlükəsi olan budaqlar tərəfimizdən götürülmüşdür. Gövdə ətrafı çalalar düzəldilmiş və aqrotexniki qaydada qulluq göstərilmişdir. Daha bir çalaya cavan bir ağac əkilmişdir və bundan sonra mütəmadi olaraq qulluq göstəriləcəkdir”, - deyə birlik rəsmisi qeyd edib.
Cavanşir Məmmədov onu da qeyd edib ki, quruyan ağacların yerinin dəyişdirilməsi və yaxud kəsilərək götürülməsi yalnız Ekologiya və Təbii Sərvətlər Nazirliyinin müvafiq rəyi əsasında keçirilir.
