Bakının Səbail rayonunda yeni park salınıb və yaxın vaxtlarda onun açılış mərasimi gözlənilir. Bu haqda bu gün, 16 may tarixində Bakuplus.az sosial şəbəkələrə istinadən məlumat verir.
Parkın “Alov qüllələrinin parkı” adlanacağı ehtimal olunur. Park Nəriman Nərimanov heykəli və Alov qüllələri yaxınlığında yerləşir.
Daha öncə məlum olub ki, iki hektar ərazini əhatə edən parkın sahəsinin 70 faizi yaşıllıqlardan ibarətdir. Parkın landşaftı mürəkkəb və sərt yamaclıdır. Bu park şəhərsalmanın standartlarına və müasir tələblərə uyğun şəkildə qurulur. Bu parkda insanların asudə vaxtlarını səmərəli keçirmələri üçün bütün şərait yaradılıb. Aktiv istirahəti sevən sakinlər üçün əyləncə zonaları mövcud olacaq, müxtəlif idman qurğuları, uşaq meydançası, həmçinin söhbətgahlar quraşdırılacaq, oturacaqlar qoyulacaq, sanitar qovşaq yaradılacaq. Eləcə də parkda bir ədəd fəvvarə kompleksinin inşası da aparılır.
Ərazidə, həmçinin çoxlu sayda həmişəyaşıl dekorativ ağacların, bitkilərin əkilməsi yeni salınan parkı gözəlləşdirmək ilə yanaşı havanın təmizlənməsinə də kömək edəcək.
