Paytaxtda güclü tıxacların qarşısının alınması və paytaxtın yol şəbəkəsinin inkişafı üçün bir sıra əlavə zəruri tədbirlər nəzərdə tutulur. Bu, Bakının 2040-cı ilədək inkişafına dair Baş planında qeyd olunub. Bu haqda bu gün, 8 yanvar tarixində Bakuplus.az məlumat verir.
Bakının avtomobil yolları şəbəkəsinin ümumi uzunluğu yerli əhəmiyyətli avtomobil yolları da daxil olmaqla 2300 km-dən 2668 km-ə çatdırılacaq.
Bundan əlavə, ictimai nəqliyyat üçün xüsusi zolaqların təşkili nəzərdə tutulur. 2040-cı ilədək ayrılmış zolaqların ümumi uzunluğu indiki 16 zolaqdan 112,2 zolaq-kilometrə qədər artırılacaq.
Eyni məqsədlə Bakı-Sumqayıt şosesində, Xırdalan və “20 Yanvar” dairələrində paytaxtın strateji 2-ci şimal-qərb yeni giriş-çıxış yolunun yaradılması planlaşdırılır. Analoji işlər Sabunçu rayonunda da keçiriləcək. Sabunçu dairəsi ilə Bülbülə gölünün qərbindən keçməklə Zığ şosesini birləşdirəcək yeni halqavari yollar yaradılacaq.
Baş Plan çərçivəsində velosiped nəqliyyatının inkişafı və müvafiq infrastrukturun yaradılması nəzərdə tutulur. 2040-cı ilə qədər velosiped yolu şəbəkəsinin təxmini ümumi uzunluğu təxminən 285 km olacaq.
Paytaxtımızın yeni Baş Planı barədə ətraflı məlumatı Dövlət Şəhərsalma və Arxitektura Komitəsinin saytında izləmək mümkündür.
