Bu gündən etibarən Əhməd Rəcəbli küçəsi ilə Ziya Bünyadov prospektinin kəsişməsində bəzi avtobusların marşrut sxemi dəyişilir. Bu haqda bu gün, 29 noyabr tarixində Bakuplus.az Azərbaycan Yerüstü Nəqliyyat Agentliyinə (AYNA) istinadən məlumat verir.
Ərazidə artıq müvafiq dəyişikliklər edilib:
- ayırıcı zolaq ləğv edilərək işıqforla nizamlanan yolayrıcı təşkil edilib;
- qeyd edilən yolayrıcından avtobusların Ziya Bünyadov prospekti ilə Atatürk prospekti istiqamətində hərəkətinə icazə verilib;
- əlilliyi olan şəxslər üçün panduslarla təchiz edilən piyada keçidləri təşkil olunub;
- yeni işıqforlar və yol nişanları quraşdırılıb, nişanlanma xətləri çəkilib;
- avtobusların hərəkət marşrutuna uyğun olaraq yeni dayanacaq məntəqələri quraşdırılıb.
Optimallaşdırma “Nəriman Nərimanov” metro stansiyası və Atatürk prospekti istiqamətinə hərəkət edən 7A, 7B, 11 və 93 nömrəli avtobuslara aiddir.
Həyata keçirilən dəyişikliklər nəticəsində marşrutların uzunluğu 1,3 km-ə qədər qısalıb, bu da hərəkət vaxtını 5-7 dəqiqə azaldacaq.
Prospektdə mövcüd olan dəyişikliklər yalnız müntəzəm sərnişindaşıma xidmətləri göstərən nəqliyyat vasitələrinə aiddir və şəxsi nəqliyyat vasitələrinə tətbiq olunmur.
[caption id="attachment_121451" align="alignnone" width="640"]
Foto AYNA[/caption]
