Abşeron yarımadasında 2027-ci ilin sonuna kimi 20 sərnişin stansiyasının yenidən qurulması, istifadəyə verilməsi və tikintisi, o cümlədən Baləcəri stansiyası ilə Bakı dəmir yolu stansiyası arasında Şimal-Cənub dəhlizi boyunca 4 yeni stansiyanın tikintisi nəzərdə tutulur. Bu, Bakının 2040-cı ilədək inkişafına dair Baş planında qeyd olunub. Bu haqda bu gün, 8 yanvar tarixində Bakuplus.az məlumat verir.
Həmçinin Lökbatan qəsəbəsindən keçən dəmir yolu infrastrukturunun yenidən qurulması və sərnişin stansiyası kimi istifadə edilməsi, Lökbatandan Bakı dəmir yolu stansiyasına müntəzəm şəhərətrafı qatarların hərəkətinin açılması nəzərdə tutulur.
Bakıxanov stansiyasından Zirəyə doğru uzanan və Bülbülə, Əmircan, Suraxanı, Yeni Suraxanı, Binə, Qala, Dübəndi və Zirədə yenidən qurulacaq 8 stansiyadan ibarət xəttin bərpası, “Qaradağ-Güzdək”, “Zabrat-Maştağa-Zuğulba” dəmiryolu dəhlizlərinin yaradılması, habelə Qaradağ rayonu ərazisində və Xocasən qəsəbəsində yeni dəmir yolu stansiyalarının yaradılması nəzərdə tutulur.
Həmçinin Heydər Əliyev Beynəlxalq Aeroportuna yeni dəmir yolu xəttinin çəkilməsi, Heydər Əliyev Beynəlxalq Aeroportundan Yeni Suraxanı və Binə qəsəbələrinə yeni dəmir yolu xəttinin çəkilməsi, həmçinin Hövsan dəmir yolu stansiyasının fəaliyyətinin bərpası nəzərdə tutulur.
2040-cı ilədək şəhərin mərkəzi ilə yarımadanın şimal hissəsi arasında birbaşa dəmir yolu əlaqəsini təmin etmək və dəmir yolu nəqliyyatının əhatə etdiyi ərazini genişləndirmək üçün “Binəqədi-Mehdiabad-Fatmayı-Pirşağı” yeni dəmir yolu dəhlizinin yaradılması nəzərdə tutulur.
Abşeron yarımadasında dəmir yolu şəbəkəsinin ümumi uzunluğunun 195,4 kilometrdən 338,6 kilometrə, stansiyaların sayının isə 26-dan 54-ə çatdırılması nəzərdə tutulur.
Paytaxtımızın yeni Baş Planı barədə ətraflı məlumatı Dövlət Şəhərsalma və Arxitektura Komitəsinin saytında izləmək mümkündür.
