Paytaxt ərazisində bəzi küçələrin eyniadlı olması bir sıra çətinliklər yaradır. Bu haqda BakuPlus.az ATV Telekanalına istinadən bu gün, 20 aprel tarixində xəbər verir.
Bakıda eyni şəxsin adını daşıyan küçələr çoxdur. Bunlara misal olaraq Əbdülvahab Salamzadə, Səməd Vurğun, Səttar Bəhlulzadə, Dadaş Bünyadzadə, Cəfər Cabbarlı, Mikayıl Müşfiq, Həsən Bəy Zərdabi küçələrini göstərmək olar.
Bu vəziyyətlə bağlı paytaxt sakinləri də narahatlıqlarını bildiriblər. Onların fikrincə, bir şəxsin adı bir küçədə olmalıdır. Eyniadlı küçələrin olması təcili tibbi yardım üçün də çətinlik yarada bilər.
Millət vəkili Fazil Mustafa bildirib ki, qanunvericilikdə bununla bağlı hər hansı bir məhdudiyyət yaxud da qadağa yoxdur. Lakin o, eyni şəxsin adının bir neçə yerə verilməsini düzgün saymır:
“Bir qayda yaratmaq lazımdır ki, bir ad Bakı şəhərinin inzibati ərazisində yalnız bir küçəyə verilsin. Çünki çox küçələrdə eyni ad olanda kommunikasiyada problemlər ortaya çıxır”.
“44 günlük savaşda, birinci Qarabağ müharibəsində olan çox sayda şəhidlərimiz, qəhrəmanlarımız var. Təkrarlanan küçələrə həmin şəhid və qəhrəmanların adları verilsin. Onların adlarını əbədiləşdirmək bizim üçün prioritet məsələlərdən biridir”, - deyə Fazil Mustafa təkilf edib.
Bakı Şəhər İcra Hakimiyyətindən isə bildirilib ki, aralarında azı 5 kilometr məsafə varsa, fərqli rayon, qəsəbə və ya kənd ərazisində yerləşirlərsə, küçələrin eyni adda olmasına qanunla yol verilir.
