Bakıda və Abşeron yarımadasında ötən gündən etibarən qeyri-sabit hava şəraiti müşahidə olunur, güclü külək əsir. Küləkli hava paytaxtda müxtəlif fəsadlara səbəb olub. Bu haqda bu gün, 28 noyabr tarixində Bakuplus.az Fövqəladə Hallar Nazirliyinin (FHN) mətbuat xidmətinə istinadən məlumat verir.
Nəsimi rayonu, Azadlıq prospekti, 88 ünvanında yerləşən iyirmiikimərtəbəli yaşayış binasının 17-ci mərtəbəsində pəncərə çərçivəsi qoparaq asılı vəziyyətdə qalıb. Hadisə yerinə cəlb olunan xilasedicilər pəncərə çərçivəsini kənarlaşdırıblar.
Bununla yanaşı, Suraxanı rayonu, Yeni Günəşli qəsəbəsi, bina 20 ünvanında doqquzmərtəbəli yaşayış binasının dam örtüyünün qoparaq asılı vəziyyətdə qalan hissəsi götürülüb. Nərimanov rayonu, Nəsib bəy Yusifbəyli küçəsi, 79a ünvanında yerləşən iyirmibirmərtəbəli yaşayış binasının 15-ci mərtəbəsinin eyvanında asılı vəziyyətdə qalmış metal parçası bərkidilərək insanlar üçün yaranmış təhlükə aradan qaldırılıb.
