Paytaxtın mərkəzi küçələrində velosipedçilər və skuterçilər üçün zolaq çəkilsə də, sürücülər onu zəbt ediblər. Bu haqda bu gün, 23 dekabr tarixində Bakuplus.az ARB Xəbər-ə istinadən xəbər verir.
Sürücülər səbəblər taparaq velosiped zolağının üzərində nəqliyyat vasitələrini park edərək velosiped sürücülərinin və skuterçilərin hərəkətinə maneə yaradırlar. Maşın sahiblərinin bəziləri mağazadan nəsə almaq üçün saxlayırlar, bəziləri sərnişin gözləyirlər, bəziləri isə ümumiyyətlə, zolağın əhəmiyyətini anlamırlar.
Azərbaycan Yerüstü Nəqliyyat Agentliyinin (AYNA) əməkdaşları yerdə zolağın təyinatını əks etdirən nişanlarla yanaşı, əlavə məlumat zolaqlarını da çəkirlər. Velosiped zolağının üzərinə çəkilən yeni boya bu zolaqda velosipedçilərin və skuterçilərin hərəkət üstünlüyünə malik olduqlarını bildirir.
Bakı Şəhər Dövlət Yol Polisi İdarəsinin (BŞDYPİ) baş inspektoru Araz Əsgərlinin verdiyi məlumata əsasən, velosipedçilər üçün çəkilmiş zolaqlara digər avtomobil daxil olsa, inzibati xətalar məcəlləsinin “nişanın tələbinin pozulması” maddəsi üzrə məsuliyyət formalaşır. Bu halda qayda pozan şəxsə 40 manat məbləğində cərimə nəzərdə tutulur.
