Əmlak eksperti Elnur Fərzəliyev kirayə mənzil bazarında ucuzlaşma ola biləcəyini deyib.
Əmlak eksperti Elnur Fərzəliyev kirayə evlərlə bağlı son durumu “Yeni Sabah”a açıqlayıb:
“Hər il avqustun sonundan sentyabrın birinci yarısına qədər Bakıda və digər iri şəhərlərdə kirayə mənzil tələbatı artır. Bu, əsasən tələbələrin paytaxta üz tutması ilə bağlıdır. Tələbatın artması ilə mənzil sayı azalır və qiymətlər yüksəlir. Mənzillərin satış qiymətinin artması kirayə qiymətlərinə də təsir edir. Eyni zamanda, 2016-cı ildən etibarən köhnə binaların sökülməsi və yeni tikilən binalarla əvəzlənməsi səbəbindən ucuz kirayə mənzillər azalıb. Yeni tikilən mənzillər isə köhnələrindən iki dəfə baha qiymətə təklif olunur. Bu səbəbdən yaxın gələcəkdə ucuz kirayə mənzillər əldə etmək çətin olacaq”.
Ekspert əlavə edib ki, tələbələrin kirayə mənzil problemi tarixən təhsil müəssisələrinin yataqxanaları ilə həll olunurdu. Lakin Qarabağ münaqişəsi və məcburi köçkünlərin bu yataqxanalara yerləşməsi vəziyyəti dəyişdirib.
Məcburi köçkünlər bərpa olunan Qarabağ ərazisinə geri dönür, bu da yataqxanaların yenidən tələbələr üçün əlçatan olmasını təmin edə bilər. Yataqxanaların müasir binalarla əvəzlənməsi kirayə mənzil bazarında qiymətlərin aşağı düşməsinə səbəb ola bilər.
