Hadisə ilə bağlı TƏBİB-dən bildirilib ki, bu gün, saat 04:26 radələrində Qaradağ rayonu, Qobustan qəsəbəsi, 61-ci km ünvanından “103” qaynar xəttinə çağırış daxil olub.
Çağırışa gələn briqada 9 yaşlı oğlanın həkiməqədər ölümünü qeydə alıb.
Ölüm səbəbini dəqiqləşdirmək üçün tibbi ekspertiza və pataloji anatomik müayinə təyin olunub.
12:09 - Bakıda məktəbli qızılcaya yoluxaraq ölüb
Bakının Qaradağ rayonu, Qobustan qəsəbəsində yerləşən 195 saylı məktəbin şagirdi qızılcaya yoluxaraq dünyasını dəyişib. Bu haqda bu gün, 30 noyabr tarixində məktəbin müəllimi Aynur Cavid öz Facebook səhifəsində məlumat paylaşıb.
“Məktəbin 4-cü sinfində təhsil alan Rinat ailənin tək övladıdır. Dünən gecə saatlarında yüksək temperaturla həyatını itirib”, – deyə Aynur Cavid əlavə edib.
Regional Gigiyena və Epidemiologiya Mərkəzi ölüm faktı ilə bağlı araşdırma aparmaq niyyətində olduğunu bildirir.
Daha öncə Aynur Cavid valideynlərə istinadən bildirib ki, öz sinfində əlavə 19 şagird virusa yoluxub. Şagirdlərin çoxu xəstəliyi ağır keçirir. Məktəbdə hadisə ilə bağlı artıq dezinfeksiya tədbirləri görülüb.
Müəllim, həmçinin yazıb ki, yoluxmuş uşaqların ailələrinə tibbi və maddi dəstək lazımdır. Ailələrin çoxu aztəminatlıdır və dərmanlara ehtiyacı var.
Məktəbdə baş vermiş ölüm hadisəsini məktəb direktoru Laçın Hüseyinli də təsdiqləyib.
