Azərbaycanda qızılca infeksiyası yayılır. Bu barədə son vaxtlar mətbuatda fəal şəkildə məlumatlar yayılır. Bununla bağlı həm TƏBİB, həm də Respublika Gigiyena və Epidemiologiya Mərkəzi açıqlama verib. Şagirdlərin valideynləri bildirirlər ki, indi peyvənd olunmamış uşaqların valideynləri məsuliyyətə cəlb olunacaqlar. Bu haqda bu gün, 21 noyabr tarixində Bakuplus.az 1News-ə istinadən məlumat verir.
Valideynlərin biri qeyd edir ki, bir vaxtlar övladına, o cümlədən qızılca peyvəndini vurmaqdan imtina edib. Amma övladının oxuduğu məktəbdə valideyn “çat”ına guya Respublika Gigiyena və Epidemiologiya Mərkəzinin əməkdaşından mesajlar göndərilib. Həmin əməkdaş məktəb həkimi vasitəsilə peyvənd olunmamış uşaqların valideynlərini sözün əsl mənasında hədələyərək bildirib ki, Milli Məclis qərar verib və indi peyvənd olunmayan uşaqların valideynləri məsuliyyətə cəlb olunacaqlar.
Azərbaycan Elm və Təhsil Nazirliyinin mətbuat xidmətindən bildirilib ki, peyvəndlə bağlı məsələlərlə tibb işçiləri məşğul olurlar. Nazirlik valideynlərlə bağlı heç bir göstəriş və ya tədbir görmür.
Respublika Gigiyena və Epidemiologiya Mərkəzindən bildirilib ki, 2023-cü ilin aprel ayından etibarən Rusiya və Türkiyədən Azərbaycana gələnlər arasında xəstəlik halları nəticəsində qızılcaya yoluxma halları qeydə alınmağa başlayıb. Əsasən, peyvənd olunmamış uşaqlar və yeniyetmələr yoluxurlar. Peyvənd təqviminə görə, peyvənd uşağa 12 ayında və 6 yaşında vurulur.
Azərbaycanda istifadə olunan vaksin tamamilə təhlükəsiz və effektivdir. Peyvəndləmə könüllülük əsasında həyata keçirilir. Hazırda qanunda övladına peyvənd vurmaqdan imtina edən valideynlər üçün hər hansı cəza və ya töhmət nəzərdə tutulmur.
Azərbaycan Milli Məclisinin Səhiyyə Komitəsindən bildirilib ki, bu məsələ müzakirə olunmayıb və onlara heç bir aidiyyəti yoxdur.
