Bakıda metro stansiyalarının sayının 25-dən 46-ya çatdırılması planlaşdırılır. Bu, Bakının 2040-cı ilədək inkişafına dair Baş planında qeyd olunub. Bu haqda bu gün, 8 yanvar tarixində Bakuplus.az məlumat verir.
Plana əsasən, metro Bakının ictimai nəqliyyat sistemində aparıcı rol oynamağa davam edəcək və aqlomerasiyanın ən sıx məskunlaşdığı əraziləri ilə mərkəzi rayonlar arasında əsas əlaqəni təmin edəcək.
“28 May” metro stansiyası metro şəbəkəsi üçün böyük əhəmiyyət kəsb edən mərkəzi qovşağı olaraq qalacaq. 2027-ci ilədək “28 May” - “Cəfər Cabbarlı” keçid stansiyasında yaşıl və qırmızı xətlərin ayrılması, həmçinin yeni infrastrukturun yaradılması nəzərdə tutulur.
2040-cı ilədək Bakı Metropoliteni xətlərinin ümumi uzunluğunun indiki 36,7 km-dən 76,2 km-ə, stansiyaların sayının isə 25-dən 46-ya çatdırılması planlaşdırılır.
Paytaxtımızın yeni Baş Planı barədə ətraflı məlumatı Dövlət Şəhərsalma və Arxitektura Komitəsinin saytında izləmək mümkündür.
