Paytaxtda taksi sürücüsünü dişləyən və bıçaqlayan şəxsə hökm oxunub. Bu haqda bu gün, 7 dekabr tarixində Bakuplus.az Avtosfer.az-a istinadən xəbər verir.
Bakı Ağır Cinayətlər Məhkəməsin qərarına əsasən, Mahir Pənahov (ad və soyad şərti) 4 il 6 ay müddətinə azadlıqdan məhrum edilib.
Hadisə cari ilin may ayında paytaxtın Sabunçu rayonu, Maştağa qəsəbəsində yerləşən “Humay” marketinin yaxınlığında baş verib.
Mahir Pənahov müştəri qismində Daşqın Babayevin (şərti) idarə etdiyi “Toyota Prius” markalı avtomobilə əyləşib. Sürücü onu sifariş verdiyi ünvana yanlış yolla apardığı üçün onların arasında mübahisə başlayıb.
Öncə sürücü sərnişinin yumruqla üst dodağına xəsarətlər yetirib. Mahir isə sürücünün sol qolu, sinəsi və qarın nahiyəsindən dişləyib, daha sonra sinəsinə bıçaq zərbəsi endirib.
