Bakıda talassemiyalı uşaqların valideynlərini aldadaraq külli miqdarda pul oğurlamaqda təqsirli bilinən qadın həbs edilib. Bu haqda bu gün, 27 dekabr tarixində Baş Prokurorluğun İnstagram sosial şəbəkəsindəki canlı yayımda qurumun idarə rəisi Natiq Abdullayev məlumat verib.
O bildirib ki, talassemiyalı xəstələrin valideynlərinin müraciəti bu ilin fevral ayında daxil olub: “Bu məlumat əsasında cinayət işi açılıb, Nuridə Seyidova adlı şəxsin Aysel Məmmədova adlı qadınla əlbir olması müəyyən edilib. 36 talassemiyalı xəstənin valideynlərinin etibarından sui-istifadə edərək uşaqlarını Türkiyədə müalicə etdirmək adı ilə onlardan 980.000 manat pul mənimsənilib.
Seyidova barəsində həbs qətimkan tədbiri seçilib. Hazırda cinayət işi üzrə istintaq davam etdirilir”.
