Əcnəbi vətəndaşlar Yazdan Şenas Xales Hossein Ramezanali və Javidanhelan Ehsan Hossein barəsində cinayət işi üzrə istintaq Azərbaycan Respublikası Dövlət Təhlükəsizliyi Xidmətində (DTX) başa çataraq materiallar Bakı Ağır Cinayətlər Məhkəməsinə göndərilib. Bu haqda bu gün, 11 yanvar tarixində Bakuplus.az APA-ya istinadən məlumat verir.
Cinayət işinə hakim Novruz Kərimov tərəfindən baxılacaq. Hazırlıq iclası yanvarın 17-də baş tutacaq.
Azərbaycana gələn şəxslər digər xarici dövlət rəsmisi kimi fəaliyyət göstərən xarici ölkə vətəndaşının Azərbaycan Respublikasına növbəti səfəri zamanı Bakı şəhərində ona qarşı sui-qəsd (terror aktı) törətməyə hazırlıq hərəkətlərində ittiham olunurlar.
Həmin şəxslər ötən ilin may ayında DTX əməkdaşları tərəfindən saxlanılıblar. Onlar “Cinayətə hazırlıq” və “Dövlət xadiminin və ya ictimai xadimin həyatına sui-qəsd etmə” maddələri ilə məsuliyyətə cəlb edilərək həbs ediliblər. Sözügedən maddələr üzrə cinayətə görə 14 ildən 20 ilədək müddətə azadlıqdan məhrumetmə və ya ömürlük azadlıqdan məhrumetmə cəzaları nəzərdə tutulur.
