Bakıdakı xəstəxanada həkimlər əməliyyat zamanı canlı yayım açıblar. Bu haqda bu gün, 9 dekabr tarixində Bakuplus.az Oxu.az-a istinadən xəbər verir.
Hadisə “Elmlər Akademiyası” stansiyası yaxınlığında, Kazım Kazımzadə, 99 ünvanında yerləşən “Uni” klinikasında baş verib. Həkim Elmir Qəhrəmanovun icra etdiyi əməliyyat zamanı tibb işçiləri TikTok sosial şəbəkəsində canlı yayım açıblar.
Canlı yayım zamanı izləyicilər şərh bölməsindən xanımlardan “Komutan”, XTQ, “Hidayət” kimi sözləri əlinə yazmalarını istəyirlər. Xanımlar isə əlcəklərin üzərinə həmin sözləri qeyd ediblər.
Sözügedən görüntülər sosial şəbəkə istifadəçilərinin narazılığına səbəb olub. Onlar antisanitariyaya yol verildiyini vurğulayıblar.
Klinikanın direktoru Elmir Daşdəmirov hadisənin doğruluğunu təsdiqləyib.
“Videogörüntülərdən xəbərim yox idi, indi gördüm. Həkim çağırılacaq, töhmət veriləcək. Mən işdən azad etsəm, gedib ayrı müəssisədə işləyəcək. Həkimdir, diplomunu da əlindən ala bilmərəm”, – deyə o bildirib.
