Xəzər rayonunda azyaşlı uşağı vuran sürücü barəsində qərar verilib. Bu haqda bu gün, 14 dekabr tarixində Bakuplus.az Qafqazinfo-ya istinadən xəbər verir.
Məhkəmənin qərarı ilə 42 yaşlı Elsevər Dədəcanov 3 il sürücülük hüququndan məhrum olunmaqla 5 il 2 ay müddətinə həbs cəzasına məhkum edilib.
Hadisə cari ilin aprel ayında baş verib. Təqsirkar "Volkswagen Touareg" markalı avtomobillə 7 yaşlı İbrahim Məmmədovu vurub. Nəticədə yaralı xəstəxanada vəfat edib.
“Qonşularla küçəyə çıxıb söhbət edirdik. Uşaqlar məhəllədəki qaz borusunun yanında idman edirdilər. 6 nəfər dayanıb söhbət edirdik. Bu zaman Elsevər yolu sürətlə döndü. Yanımdakı şəxslər Elsevərə tərəf qışqıraraq: “Yavaş”, – dedilər. Sürücü isə əli ilə əsəbi halda biz tərəfə işarə edərək sürəti azaltmadı. Bu vaxt uşaq bizə tərəf qaçdı və maşın onu vurdu. Zərbədən uşaq 20 metr və bəlkə də daha çox sürüşərək 334 saylı məktəbin hasarına və daha sonra zibil qabına çarpıldı. Elsevərin uşağa kömək etmək istəməsi barədə dediyi yalandır. O, hadisə vaxtı əyləcə basmayıb, uşağı vurduqdan sonra 50-60 metr irəliləyərək maşını yolun digər tərəfində saxladı. Əvvəlcə qardaşım Elsevərin yanına getdi. Mən uşağa doğru gedə bilmədim, buna ürək etmədim. Həmin vaxt Elsevəri vurdum, bunu etiraf edirəm. Onu boğmaq istədim, lakin xalam oğlu onu əlimdən aldı. Daha sonra uşağı xəstəxanaya apardıq”, – deyə mərhum uşağın atası O.Məmmədov danışıb.
