Paytaxtda 50 nəfərə yaxın vətəndaş dil kursunu dələduzluqda ittiham edir. Bu haqda bu gün, 14 dekabr tarixində Bakuplus.az Xəzər Xəbər-ə istinadən xəbər verir.
Verilən məlumata əsasən, şikayətçilər “İamzerv” adlı kursda qeydiyyatdan keçərək, ödəniş ediblər və dərslərin başlamasını gözləyiblər. Lakin uzun müddət onları heç kim çağırmayıb.
“Mən oktyabrın 31-də “İamzerv” kurslarının rəhbəri Azər İsmayılova 300 manat ödəniş etmişəm. Bundan sonra mən dərslərin başlamasını gözlədim, lakin mənə heç bir informasiya verilməyib və odəniş geri qaytarılmayıb”, – deyə şikayətçilərdən biri bildirib.
Uzun gözləmədən sonra, tələbələr dərslərə başlasalar da, müəllim maaşı ödənmədiyi üçün dərs keçə bilməyəcəyini vurğulayıb.
Şikayət edənlər arasında bu akademiyada çalışan müəllimlər də var. Onlar iddia edirlər ki, onların əməkhaqları aylarla ödənilmir.
“Mənim 1 ayım tamam olandan sonra hər gün müxtəlif bəhanərlə əməkhaqqımı ödəmədilər”, – deyə şikayətçi müəllim qeyd edib.
Məsələ ilə bağlı akademiyanın rəhbəri Azər İsmayılov deyib ki, böyük dinləyici kütləsi olan tədris ocağında bəzən cüzi anlaşılmazlıqların yaranması normaldır. Bununla belə sözügedən problemi həll etməyə çalışırlar.
Həmçinin rəhbər ona qarşı qarayaxma olduğunu əlavə edib.
Şikayətçilər isə məsələ ilə bağlı hüquq-mühafizə orqanlarına müraciət ediblər.
