Bakı Şəhər Halqası Əməliyyat Şirkətinin şöbə rəisi Çingiz Mehdiyevin məhkəməsi davam edir. Bu haqda bu gün, 16 aprel tarixində Bakuplus.az Qafqazinfo-ya istinadən xəbər verir.
Bakı Ağır Cinayətlər Məhkəməsində keçirilən iclasda Leyla Əsgərova-Məmmədova deyib ki, müttəhimə qarşı irəli sürülmüş ittihamlar sübuta yetirilsə, o, 12 ilə kimi azadlıqdan məhrum edilə bilər.
Prokuror təqsirləndirilən şəxsin dindirilməsi ilə prosesin davam etməsini təklif edib. Müdafiə tərəfi isə bununla razılaşmayıb. Mehdiyevin vəkili əvvəlcə Bakı Şəhər Halqası Əməliyyat Şirkətinin nümayəndəsinin dindirilməsini istəyib:
“Bizə maraqlı olan bəzi məsələlər var. 20-ci şəxsi (Çingiz Mehdiyevi nəzərdə tutur - red.) gətirib qoyublar birinci şəxsin yerinə… Zərərçəkmiş tərəf gəlib izah etsin, sonra müvəkkilim ifadə versin”, – deyə vəkil bildirib.
Proses 6 may tarixində Ç.Mehdiyevin sərbəst şəkildə ifadəsi ilə davam edəcək.
Təqsirləndirilən şəxs “Formula 1”ə ayrılan 400.000 AZN-ni mənimsəməkdə ittiham olunur.
