Bakıda sürücü yol polisinin özbaşınalığından və küçə parkinqini tənzimləyən “AzParking” tətbiqinin düzgün işləməməsindən şikayətlənir. Bu haqda bu gün, 30 noyabr tarixində Bakuplus.az sürücünün Facebook səhifəsinə istinadən məlumat verir.
Facebook sosial şəbəkəsinin istifadəçisi Murad Muradinin sözlərinə görə, o, oktyabrın 9-da Xəqani küçəsində yerləşən 90250 nömrəli “AzParking” tərəfindən ayrılmış dayanacaqda özünə məxsus “Mercedes” markalı avtomobilini saxlayıb.
“Bununla bağlı “AzParking” mobil tətbiqində müvafiq qeyd etdim. Buna baxmayaraq, yol polisi küçədə quraşdırılmış videomüşahidə kamerasından istifadə edərək parklanma qaydalarını pozduğuma görə mənə 20 manat cərimə göndərdi. Mən qanuna riayət edərək proqramı yüklədim, qeydiyyatdan keçdim, düzgün park etdim, proqramda hər şeyi qeyd etdim və yenə də cərimə aldım!” – deyə Muradi qəzəblənib.
Məsələ ilə bağlı Muradi Bakı Şəhər Dövlət Yol Polisi İdarəsinə müraciət edib, lakin rəis Rəşid Piriyevin imzası ilə cavab məktubunda ona cərimənin tamamilə düzgün tərtib edildiyi bildirilib.
“AzParking” tərəfindən isə vətəndaşın probleminə məhəl qoyulmayıb.
[URIS id=121650]
