Yanvarın 14-15-də paytaxtda hava şəraitinin dəyişəcəyi, bəzi yerlərdə qar yağacağı gözlənilir. Bu həm yerüstü nəqliyyatın, həm də metronun fəaliyyətində fasilələrə səbəb ola bilər. “Bakı Metropoliteni” QSC-nin mətbuat katibi Bəxtiyar Məmmədovun verdiyi məlumata görə, Bakı Metropoliteni qeyri-sabit hava şəraitinə tam hazırdır. Bu haqda bu gün, 13 yanvar tarixində Trend məlumat verib.
O qeyd edib ki, məhz belə problemlərin həlli üçün qarla mübarizə qərargahı yaradılıb. Qərargah müvafiq avadanlıq, alət və işçilər üçün xüsusi geyimlər, ayaqqabılar və digər fərdi mühafizə vasitələri ilə təmin olunub.
Güclü qar yağdığı və şaxtalı hava şəraitində stansiyanın pilləkən qəfəslərindən qarın təmizlənməsi üçün alətlər ehtiyatı hazırlanmışdır. Pilləkənlərin buzlanmasının qarşısını almaq üçün hər bir stansiyada duz saxlanılır. Stansiyanın əməkdaşlarına əlverişsiz hava şəraitində, xüsusilə qar yağan zaman işləmək tapşırılıb”, - deyə qurum rəsmisi bildirib.
