Bakı milyonçularından biri olan Hacı Sultanəlinin məzarının büstü dağılır. Bu haqda bu gün, 29 noyabr tarixində BakuPlus Lent.az-a istinadən xəbər verir.
Sabunçu rayonunun Ləhiş bağları ərazisində yerləşən məzarın başdaşı hissəsi uçuq-sökük vəziyyətdədir. Görünüşündən uzun müddət baxımsız qaldığı hiss olunur.
“Milyonçunun qohumlarında həmin ərazinin sənədləri var. Ərazi bağ sahəsidir. Qəbiristanlıq deyil. Orada həmin qohumlara məxsus başqa qəbirlər də olmalıdır. Milyonçu vəsiyyətə əsasən, həmin bağ sahəsində dəfn edilib. Məzara milyonçunun nəvə-nəticəsi, öz qohumları baxmalıdır. Bu, bələdiyyənin səlahiyyətində deyil”, - deyə Kürdəxanı qəsəbə bələdiyyəsindən bildirilib.
1851-ci ildə Balaxanı qəsəbəsində dünyaya göz açan Hacı Sultanəli Haşım oğlu Bakıda 3 məscid və 1 hamam, Balaxanı qəsəbəsində 1 məktəb, həmçinin Quba rayonunda 1 məscid tikdirib. Hacı Sultanəli fəhləlikdən Bakının gənc milyonçusuna çevrilib. Hacı Zeynalabdin Tağıyevin yaxın dostu olub. Milyonçu 1921-ci ildə infarktdan vəfat edib.
Öz vəsiyyəti ilə Ləhiş bağlarında tikdirdiyi məscidin yanında dəfn edilib.
