Paytaxtın Yasamal rayonu, Cəfər Cabbarlı, 4 ünvanındakı binanın sakinləri uzun müddətdir ki, təhlükəli vəziyyətlə üzləşirlər. 1914-cü ildə tikilmiş, 2001-ci ildə isə tarix-memarlıq abidəsi kimi qeydiyyata alınan bina 30 ildir qəzalı vəziyyətdədir. Bu haqda bu gün, 3 noyabr tarixində Baku TV reportaj hazırlayıb.
Binanın içində olan nəm qoxusu sakinləri narahat edir. Həmin qoxunun səbəbi isə zirzəmidə toplanan sudur. Bəzi mənzillərin tavanı uçaraq tamamilə yararsız vəziyyətə düşüb.
100 ildən çox yaşı olan bina dəmir dirəklər sayəsində ayaq üstə saxlanılır. Hər gün ölüm təhlükəsi ilə üzləşən bina sakinlərinin nə vaxt təxliyə olunacaqları, həmçinin tarixi-memarlıq abidəsinin bərpa prosesi ilə bağlı Yasamal Rayon İcra hakimiyyətindən bildirilib ki, problemin aradan qaldırılması istiqamətində yaxın zamanda işlərə başlanılacaq.
Yasamal RİH aparatının şöbə müdiri Xaqan Teymurov bildirib: “Hal-hazırda aidiyyəti qurumlar tərəfindən tikinti-bərpa işlərinə hazırlıq gedir. Qısa zamanda bərpa prosesi başlayacaq. Tikinti-bərpa zamanı orada yaşayan sakinlər digər ünvanlara köçürüləcəklər”.
[caption id="attachment_77645" align="alignnone" width="640"]
Foto Baku Tv-nin rəsmi Youtube kanalı[/caption]
