Bakı Nəqliyyat Agentliyinin əməkdaşları rüşvət almaqda ittiham olunurlar. Bu haqda bu gün, 11 yanvar tarixində Bakuplus.az Oxu.az-a istinadən xəbər verir.
BNA-nın Yol Hərəkətinin təşkili şöbəsinin müdir müavini Vüqar Hüseynov və qurumun məsləhətçisi Hikmət Vəlizadənin məhkəməsi davam edir.
İttihama görə, qurum özəl klinikalar, restoranlar və başqa obyektlərin qarşısında parklanmaya icazə almaqdan ötrü külli miqdarda rüşvət alıb.
“Avrasiya” hospitalının yerləşdiyi küçədə hərəkəti birtərəfli etmək üçün BNA klinikadan 5000 AZN pul alıb. “New Med” klinikasının önündə isə parklanmanın təşkilinə icazə üçün 5000 AZN götürülüb.
Bundan əlavə, həmin şəxslər çoxmərtəbəli binaların tikintisi ilə məşğul olan şirkətlərin birindən də rüşvət tələb ediblər. Pul verməkdən imtina edən şirkət BNA-dan “parklanmanın təşkilinə icazə verilmir” məktubunu alıb.
Təqsirləndirilənlər ittihamları qəbul etməyib və özlərini təqsirli bilməyiblər.
Məhkəmənin növbəti iclası 30 yanvar tarixində keçiriləcək.
