Bir neçə gün əvvəl Bakı Dövlət Sirkinin fəaliyyəti texniki nasazlıq aşkar edildiyi və təhlükəsizlik standartlarına uyğun gəlmədiyi üçün dayandırılıb. Bu haqda bu gün, 13 yanvar tarixində Bakuplus.az Xəzər Xəbər-ə istinadən məlumat verir.
1967-ci ildə istifadəyə verilən bina o vaxtdan əsaslı təmir olunmayıb. Bir neçə gün əvvəl sirk mövcud vəziyyəti müasir tələblərə cavab vermədiyi üçün fəaliyyətini dayandırıb.
Bakı Dövlət Sirkinin direktor müavini Nahid Ağayev bildirib ki, aşkar edilmiş problemlərin aradan qaldırılması istiqamətində işlər aparılır. Onun sözlərinə görə, hazırda binanın müxtəlif hissələrində təmir işləri aparılır və bəzi hissələrlə bağlı ekspert rəyi tələb olunur.
Ağayev onu da əlavə edib ki, sirkin öz heyvanları yoxdur və tamaşalarda çıxış etmək üçün başqa ölkələrdən gətirilmiş heyvanlar xüsusi ayrılmış yerlərdə saxlanılır.
O qeyd edib ki, problemlər aradan qaldırıldıqdan və Mədəniyyət Nazirliyindən müsbət rəy alındıqdan sonra sirkin fəaliyyəti bərpa olunacaq.
