Bakıda avtomobilin pəncərəsindən küçələrə saxta 100 manatlıq əsginaslar səpələyən şəxs tutulub. Bu haqda BakuPlus.az Qafqazinfo-ya istinadən bu gün, 18 may tarixində xəbər verir.
Cəlilabad rayon sakini, 26 yaşlı S.Sadıqov Sübhan adlı dostuna məxsus “Opel” markalı avtomobillə Bakı-Sumqayıt yolu ilə hərəkətdə olarkən pəncərədən küçəyə yüz manatlıqlar səpələməyə başlayıb.
Bu zaman onları təqib edən polis əməkdaşlarını görən Sadıqov və dostu polisin qanuni tələbinə məhəl qoymayaraq avtomobillə uzaqlaşmağa çalışıblar. Polislərin təqibindən sonra onları Səbail rayonu, Lermontov küçəsində yaxalamaq mümkün olub.
Sübhan maşından düşərək qaçsa da, S.Sadıqov yaxalanıb. Avtomobildən xeyli miqdarda saxta manat və dollar əsginasları aşkar edilib.
Saxlanılan şəxs bildirib ki, saxta pulları "Torqovaya"da 150 ədədinə 15 manat verərək alıb.
Onun barəsində İnzibati Xətalar Məcəlləsinin 535-ci (Polis işçisinin qanuni tələbinə qəsdən tabe olmama) maddəsi ilə protokol açılıb və məhkəməyə göndərilib.
Səbail Rayon Məhkəməsinin qərarı ilə S.Sadıqova 8 sutka inzibati həbs cəzası verilib.
