Ermənistan tərəfindən Azərbaycanın 2 hərbi qulluqçusu- Hüseyn Axundov və Aqşin Bəbirov azad olunub. Bu haqda bu gün, 13 dekabr tarixində Bakuplus.az məlumat verir.
Azərbaycan tərəfində saxlanılan erməni hərbçilərinin Beynəlxalq Qızıl Xaç Komitəsi tərəfindən sağlamlıq durumları yoxlanılaraq qənaətbəxş hesab edildikdən sonra müvafiq razılaşmaya əsasən, Azərbaycan-Ermənistan sərhədinin Qazax rayonundan keçən hissəsində hərbi qulluqçuların qarşılıqlı şəkildə təhvil verilməsi həyata keçirilib.
Təhvilvermə prosesində hər hansı insident baş verməyib.
14:32 - Bakı və İrəvan bu gün Azərbaycan-Ermənistan sərhədində hərbi əsirlərin mübadiləsini aparacaqlar
Bu gün, 13 dekabr tarixində Qazax rayonu ərazisində, Ermənistan-Azərbaycan sərhədində hərbi əsirlərin mübadiləsi baş tutacaq. Bu haqda məlumatı "Turan" informasiya agentliyi yayıb.
Görüş zamanı 2 Azərbaycan və 32 Ermənistan hərbçisinin geri qaytarılacağı gözlənilir.
Dekabrın 7-də Azərbaycan Prezidenti Administrasiyası və Ermənistan Baş Naziri Aparatının birgə bəyanatında əsirlərin dəyişdirilməsi elan edilib.
Azərbaycan Ordusunun əsgərləri – 19 yaşlı Aqşin Bəbirov və 20 yaşlı Hüseyn Axundov aprelin 9-da Naxçıvan Muxtar Respublikasının Şahbuz rayonunun Ermənistanla sərhəd ərazisində əlverişsiz hava şəraitində məhdud görmə səbəbindən itkin düşüblər. Ermənistan məhkəməsi mayın 8-də A.Bəbirovu 11,5 il müddətinə, iyunun 21-də isə H.Axundovu 20 il müddətinə azadlıqdan məhrum edib.
Sosial şəbəkələrdə yayılan məlumata görə, müdabilə prosesi artıq başlayıb.
