Bakıda son günlərdə qarlı hava və yolların buzlu olmasına görə yol-nəqliyyat hadisələrinin sayı artıb. Sığorta şirkətlərinə müraciət edənlərin sayı təxminən 2 dəfə çoxalıb. Müraciətlərin əskəriyyəti buzda sürüşmə səbəbindən baş verən qəzalarla bağlıdır. Sığorta şirkəti buzlanma nəticəsində baş verən qəzalarda dəymiş ziyanı ödəməlidirmi? Bununla bağlı Bakuplus.az ATV-yə istinadən bu gün, 18 yanvar tarixində məlumat verir.
Sığorta üzrə ekspert İlkin Nəcəfovun sözlərinə görə, sürüşmə nəticəsində baş vermiş qəzalar sığorta hadisəsi hesab olunur və dəyən zərər həmin sığorta şirkəti tərəfindən qarşılanır.
Başqa bir problem isə qəza baş verdikdən sonra istər zərərçəkən, istərsə də qəza törədən tərəfin avtomobili qəza yerindən kənara çəkməməsi ilə bağlıdır. Hər 2 tərəf avtomobili kənara çəkmək əvəzinə, hadisə yerinə sığorta əməkdaşının gəlməsini gözləyir. Onlar hesab edirlər ki, əks-halda sığorta şirkəti dəymiş zərəri ödəməkdən imtina edə bilər. Bu vəziyyət, xüsusən qarlı və buzlu yollarda tıxaclara və hətta zəncirvari avtomobil qəzalarına gətirib çıxarır.
Ekspertin sözlərinə görə, tərəflər arasında hadisənin səbəbkarı ilə bağlı hər hansı mübahisə yoxdursa və hadisə nəticəsində xasarət alan olmayıbsa, avtomobili kənara çəkməkdə heç bir problem yoxdur. Ancaq hadisə yerindən tamamilə uzaqlaşmaq da olmaz. Qəza iştirakçıları hadisə yerini tərk etdikdən sonra polis və sığorta şirkətinə məlumat verərsə, bu məsuliyyət yaradır. Belə hallarda yol polisi hadisə yerindən yayınmağa görə 4 bal və 80 manat cərimə təyin edə bilər. Sığorta şirkəti isə bu halda dəyən ziyanı ödəməkdən imtina hüququna malikdir. Çünki qanunveriliciyə görə, bu halda artıq sığorta şirkətinin öhdəliyi tamamilə aradan qalxır.
