“Azərbaycan Dəmir Yolları” QSC (AYD) İsveçrənin “Stadler Rail Group” şirkətindən iki FLİRT tipli dizel qatarı alıb.
Qatarların təqdimatı Sərnişindaşıma departamentinin icraçı direktoru Azər Fərəcovun iştirakı ilə baş tutub.
Fərəcov xatırladıb ki, “Stadler Rail Group” şirkəti ilə 2019-cu ilin noyabrında Azərbaycana 6 elektrik və 4 dizel FLİRT qatarının tədarükü ilə bağlı razılıq əldə olunub.
O, həmçinin qeyd edib ki, qatarlar birmərtəbəlidir, hər biri 5 vaqondan ibarətdir və 236-270 sərnişin qəbul edə bilir.
"Yeni qatarlar sərnişinlərin sürətli və fasiləsiz internetə çıxışını təmin edən "Fluidmesh" texnologiyası ilə təchiz edilib. Sistem sərnişinlərə müxtəlif əyləncə proqramlarına baxmağa imkan verəcək ki, bu da səfər zamanı xoş təəssürat yaradacaq. Yeni FLİRT qatarlarının digər üstünlüyü bar vaqonunun olmasıdır. Regional səyahət zamanı sərnişinlər isti və soyuq içkilər və qəlyanaltılar ala bilərlər”, – deyə Fərəcov əlavə edib.
