Bakıxanov qəsəbəsində yerləşən “Arzu” şadlıq sarayından havaya yayılan tüstü ətrafda yaşayan sakinlərin narazılığına səbəb olub.
Sakinlərin axar.az-a verdiyi məlumata görə, toy zamanı sarayın mətbəxindən, əsasən də kabab bişirilən vaxtlarda ətrafa sıx tüstü yayılır.
Ekologiya və Təbii Sərvətlər Nazirliyinin (ETSN) mətbuat katibi İradə İbrahimova açıqlamasında bildirib ki, monitorinqlər zamanı xeyli sayda obyektdə nöqsanlar aşkar olunub:
“ETSN-in 11 saylı Regional Ekologiya və Təbii Sərvətlər İdarəsi və Ətraf Mühitin Çirklənməsinin Monitorinq Qrupu tərəfindən aparılan monitorinqlər zamanı təkcə “Arzu” şadlıq sarayında deyil, daha 18 ictimai iaşə obyektində havaya atılan tullantıların miqdarının normadan artıq olduğu müəyyən edilib.
Faktlarla bağlı obyektlərin səlahiyyətli nümayəndələri barəsində inzibati protokol tərtib olunub və 2500 manat məbləğində cərimə tətbiq edilib. Hazırda həmin obyektlərə 10 gün müddətində tüstü filtrlərinin quraşdırılması üçün vaxt verilib. Quraşdırma olmasa, müvafiq qurumlara müraciət ediləcək”.
