Gilavar Foto Klubu tərəfindən təşkil olunan və beşinci dəfə keçirilən “Baku 2023” adlı beynəlxalq fotomüsabiqənin nəticələri məlum olub. Bu haqda bu gün, 21 dekabr tarixində Bakuplus.az Azərtac-a istinadən məlumat verir.
Müsabiqə Beynəlxalq Foto Sənəti Federasiyası, Beynəlxalq Bədii Fotoqraflar Assosiasiyası, Amerika Fotoqraflar Cəmiyyəti, Qlobal Fotoqraflar Birliyi və Türkiyənin Sillə Sənət Sarayı foto təşkilatının xüsusi icazələri ilə keçirilib.
Ümumilikdə 58 ölkədən 304 fotoqraf tərəfindən 4 min 435 foto təqdim edilib. İşlər Azərbaycan, Türkiyə, Polşa və Serbiyadan olan 4 nəfərdən ibarət münsiflər heyəti tərəfindən beynəlxalq fotoqrafiya təşkilatlarının qaydaları və şərtləri çərçivəsində qiymətləndirilib.
Müsabiqədə ən yüksək nəticələri göstərən fotoqraflara qızıl, gümüş və bürünc medallar, xüsusi lentlər və diplomlar təqdim olunacaq, qaliblərin fotolarından ibarət elektron kataloq hazırlanacaq.
Müsabiqədə 6 azərbaycanlı fotoqraf fərqlənib. Nurlan Tahirli qızıl medal və diplom, Valeri Xlızov iki bürünc medal və fəxri lent, Kərim Abbasov iki fəxri lent, Teymur Məmmədov, Nadejda Cavadova və Ruslan Hacızadə fəxri lent qazanıblar.
[URIS id=124026]
