Dörd il əvvəl sürüşən Bibiheybət yolu yenə təhlükəli vəziyyətə düşüb. Yolun bərpası üçün xarici mütəxəssislər dəvət olunsalar da, ərazidə yoldan ayrılan, çatlayan, yıxılan bəndlər, yağışdan sonra yaranan su hövzələrindən yuxarıda qalan kanalizasiya müşahidə olunur. Bu haqda bu gün, 13 sentyabr tarixində Bakuplus.az AzTV-yə istinadən məlumat verir.
Üstündən qısa bir müddət keçməsinə baxmayaraq, istifadəyə verilən bu yolda yenidən çatlar əmələ gəlib. Bu çatlar bütün yol və səkiboyu davam edir. Hətta yuxarı hissədə yerləşən məzarlıq da qismən çöküb. Tamamilə çökməsinə isə az qalıb. Binalar, fərdi yaşayış evləri və minlərlə insanın yaşadığı bu ərazilər sürüşmə zonaları üçün aktiv yerlərdir. Bu ərazilərdə obyektlər də fəaliyyət göstərir və bu da torpağın dayanıqlığını xeyli aşağı salır və torpaqda qum və gildən qarışıq olduğu üçün bir az yağış yağan kimi çökmələr baş verir.
“Süni terrasların yaradılması, terras şəklində yamacın uzununa kəsilməsi, eninə kəsilməsi və bu işlər müəyyən qədər sürüşmənin qarşısını alacaq, sürüşmənin fəallaşmasına imkan verməyəcək. Artıq sürüşmələrin fəallaşma vaxtıdır. Kifayət qədər ehtiyatlı olmaq lazımdır.
Bibiheybətə doğru gedəndə sürüşmə, uçqun təhlükəli ərazilər var. Qaya uçqunları gözlənilir. Onun güclü drenaj sistemi olmalıdır ki, yığılan yeraltı suları ərazidən çıxara bilsin. Bunun üstündə monitorinq də aparmaq çətindir, yəni bunu monitorinqlə təyin etmək elə də asan məsələ deyil, çünki çox baha başa gəlir”, – Cöğrafiya İnstitutunun şöbə müdiri Mirnuh İsmayılov məsələ ilə bağlı bildirib.
