Bakının Səbail rayonu, Bibiheybət yolunda bir müddət ərzində düzgün işləməyən işıqforun fəaliyyəti bərpa olunub. Bu haqda bu gün, 17 iyun tarixində Bakuplus.az Avtosfer-ə istinadən məlumat verir.
Sürücülərdən əldə olunan məlumata görə, işıqforun iş rejimində yaranan nöqsanlara görə onlar ciddi təhlükə ilə üzləşiblər. Belə ki, həm yaşıl işıq, həm də qırmızı işıq yanan zaman anidən işıqforun fəaliyyəti dayanırdı. Bu səbəbdən sürücülər işıqforun növbəti siqnala keçid etdiyini düşünərək hərəkətə başlayırdılar. Yaşıl işığın sönməsi zamanı isə sürücülər qəfil tormoz verərək dayanırdılar. Bu isə arxadan gələn nəqliyyat vasitələri üçün qəzalı vəziyyət yaradırdı.
Nəqliyyatı İntellektual İdarəetmə Mərkəzindən (NİİM) bildirilib ki, iki gün müşahidə olunan problem öz həllini tapıb. Hazırda işıqforun iş rejimində heç bir nasazlıq müşahidə olunmur.
