Mədəniyyət naziri Adil Kərimli yerli mediaya müsahibəsində bildirib ki, Azərbaycan toyları mədəniyyətin ayrılmaz hissəsi olmaqla yanaşı, milli incəsənətin təbliği üçün də mühüm platforma hesab olunur. Nazir qeyd edib ki, toy məclislərində Üzeyir Hacıbəylinin və Azərbaycan bəstəkarlarının musiqilərinə daha çox yer verilməlidir.
Mövzu ilə bağlı əməkdar artist, bəstəkar-müğənni Elza Seyidcahan modern.az-a danışıb.
Elza Seyidcahan bildirib ki, bəzi toy məclislərində Azərbaycan bəstəkarlarının əsərləri arxa plana keçirilir:
"Daha çox rus bəstəkarlarının, dünya bəstəkarlarının, Avropa bəstəkarlarının əsərlərinə rəqslər qururlar. Adətən öz bəstəkarlarımızın mahnılarını ikinci plana keçirirlər. Məncə bunu da nəzərə almaq lazımdır".
Sənətçi "Vağzalı"nın toyların himni olduğunu vurğulayıb:
"Vağzal mütləq toyda olmalıdır. Çox heyfsilənirəm ki, bəzi gənclər düşünürlər ki, vağzal artıq o biri dönəmdə qaldı. Heç də yox. Bir gəlin ki, vağzal ilə zala daxil olur, o hava həmişə onu qoruyacaq, dayağı, isməti, xanımlığı olacaq".
"Vağzal havasında o qədər fəlsəfə var ki, o qədər duyğu var ki, o qədər xeyir-dua var ki. Mən çox məyus oluram ki, bəzi gənclər vağzal ilə yox, tamam başqa, bizə aidiyyatı olmayan mahnılarlın sədası altında zala daxil olurlar. Toy ömürdə bir dəfə olur. Vağzal gəlinin, bəyin himnidir, onların loqosu, emblemi, rəmzidir".
Əməkdar artist bəzi gənclərin "müasirlik" anlayışını da tənqid edib:
"Az qalıb ki, gəlinlər evdən də vağzal ilə çıxmasınlar, Çarlestonla çıxsınlar. Elə bilirlər ki, vağzal köhnəlikdir. Yox, müasirlik bu deyil".
Sənətçi qeyd edib ki, özü də toy mərasimləri üçün müxtəlif mahnılar bəstələyib:
"Mən "Gəlinimiz" mahnısı bəstələmişəm. Bayatılardan "Haqışda" mahnısı bəstələmişəm. Bəy üçün "Bəylər bəyi" yalısı bəstələmişəm. Gəlin üçün "Ağ çiçəyim", "Mehriban gəlin" mahnıları bəstələmişəm".
