Bakı Slavyan Universitetinin (BSU) sabiq rektoru, universitetin əlavə və qiyabi təhsil şöbəsinin sabiq müdiri Dürdanə Əliyevanın cinayət işində iştirak edən Nurlana Əliyeva Azərbaycandan qaçması ilə bağlı yayılan xəbərləri təkzib edib. Bu haqda bu gün, 21 fevral tarixində Gununsesi.info məlumat verib.
“Mənim ölkədən qaçmağım barədə deyilənlər yalandır, hal-hazırda evdə oturmuşam. Məhkəməyə də ona görə getməmişəm ki, bu barədə mənə hər hansı rəsmi bildiriş gəlməyib”, - deyə Əliyeva bildirib.
Fevralın 20-də Bakı Ağır Cinayətlər Məhkəməsində keçirilən məhkəmə iclasında barəsində məhkəməyə məcburi gətirilməsi barədə qərar çıxarılan Nurlana Əliyevanın hazırda ölkədən kənarda olduğu açıqlanıb.
Əliyeva müdafiə tərəfinin vəsatəti əsasında şahid qismində məhkəməyə çağırılıb. Sabiq rektor məhkəməyə gəlmədiyi üçün onun məcburi gətirilməsinə qərar verilib.
Nurlana Əliyeva 2016-2021-ci illərdə Bakı Slavyan Universitetinin rektoru vəzifəsində çalışıb.
Məhkəmənin materiallarına görə, N. Əliyeva Dürdanə Əliyevaya qarşı Baş Prokurorluğa, eləcə də Azərbaycanın Elm və Təhsil Nazirliyinə şikayətlər verib. Şikayətdə Dürdanə Əliyevanın vəzifə səlahiyyətlərindən istifadə edərək tələbələrdən aldığı pulları mənimsədiyi bildirilir. Bundan başqa, N.Əliyeva D.Əliyevanı ona cadu etməkdə ittiham edib, nəticədə eks-rektorun səhhətində problemlər yaranıb.
