Teatr və kino aktyoru M.Dadaşov 1924-cü ildə Bakıda doğulub. O, Azərbaycan Teatr İnstitutunu (indiki Azərbaycan Dövlət Mədəniyyət və İncəsənət Universiteti) bitirib.
Gənc Tamaşaçılar Teatrında aktyor kimi işə başlayıb, daha sonra Akademik Dram Teatrının truppasına daxil olub. Dadaşov burada ilk dəfə H. Muxtarovun "Ailə namusu" pyesində rol alıb, həmçinin Ə. Ələkbərov, M. Məmmədov, A.İsgəndərov və onlarla digər sənət korifeyləri ilə çalışıb. Ümumilikdə Xalq artisti 35-ə yaxın bədii filmdə çəkilib.
Sənətkar «Axırıncı aşırım»da Qəmlo, «Dəli Kür»də Molla Sadıq, «O dünyadan salam»da Şeyx Nəsrullah, «Birisi gün gecə yarısı»nda Nəriman Nərimanov rolları ilə yaddaşlarda həkk olunub. O, teatrda ömrünün sonuna kimi çalışmış və V.Şekspirin "On ikinci gecə", L.Tolstoyun "Canlı meyit", S.Vurğunun "Fərhad və Şirin" tamaşalarında iştirak etmişdir.
Məlik Dadaşov 2 dekabr 1996-cı ildə 72 yaşında Bakıda vəfat etmişdir.
