Bu gün, 12 noyabr - Azərbaycan Respublikasının Konstitusiya günüdür.
Azərbaycan dövlətinin ilk Konstitusiyası 1921-ci il mayın 19-da I Ümumazərbaycan Sovetlər Qurultayında qəbul edilib. Daha sonra Azərbaycan SSR Konstitusiyası 1925-ci il martın 14-də SSRİ Konstitusiyasına uyğunlaşdırılmış yeni redaksiyada IV Ümumazərbaycan Sovetlər Qurultayında təsdiqlənib. 1978-ci il aprelin 21-də qəbul edilmiş Azərbaycan SSR Konstitusiyası SSRİ Konstitusiyasına uyğunlaşdırılmış olsa da, müəyyən özünəməxsusluğa malik idi.
Azərbaycan müstəqilliyini bərpa etdikdən sonra yeni Konstitusiya layihəsi üzərində ciddi iş aparılıb. 1994-cü ildə Prezident Heydər Əliyevin sədrliyi ilə Konstitusiya komissiyası fəaliyyətə başlayıb və layihə 1995-ci ildə ümumxalq müzakirəsinə təqdim olunub. 1995-ci il noyabrın 12-də isə ümumxalq referendumunda Azərbaycan Respublikasının ilk Konstitusiyası qəbul edilib.
İlk Konstitusiyanın milli dövlətçilik tarixində müstəsna əhəmiyyəti nəzərə alınaraq, 1996-cı il 1 noyabr tarixli Fərmana əsasən hər il noyabrın 12-si Konstitusiya Günü kimi qeyd edilməyə başlandı.
Yeni Konstitusiya 5 bölmə, 12 fəsil və 158 maddədən ibarətdir.
Konstitusiyaya 24 avqust 2002-ci il, 18 mart 2009-cu il və 26 sentyabr 2016-cı il tarixlərində referendum yolu ilə əlavə və dəyişikliklər edilib.
