Cari il ərzində paytaxtda 65 yaşayış binasının sökülməsi nəzərdə tutulub. Bu haqda bu gün, 23 yanvar tarixində Bakuplus.az Oxu.az-a istinadən məlumat verir.
Həmin binaların çoxunun qəzalı vəziyyətdə olduğu deyilir. Söküntü işləri ilə bağlı Nazirlər Kabineti tərəfindən Bakı Şəhər İcra Hakimiyyəti, Dövlət Şəhərsalma və Arxitektura Komitəsi, Fövqəladə Hallar Nazirliyi, İqtisadiyyat Nazirliyi və digər aidiyyəti qurumlarla birgə işçi qrupu yaradılıb.
Ümumilikdə müvafiq siyahıya 130 bina daxil edilib, onlarda 65-i ilə bağlı sənədlər Dövlət Şəhərsalma və Arxitektura Komitəsinə göndərilib, hazırlıq işləri aparılır.
Bakının təsdiqlənmiş Baş planına əsasən, ilkin mərhələdə söküləcək binalar Binəqədi, Xətai, Nizami, Nəsimi, Sabunçu və Səbail rayonlarında yerləşir. Binaların sökülməsi və əhalinin köçürülməsi bir il ərzində həyata keçirilməlidir.
Kompensasiya məbləğinə gəlincə, dəqiq məlumat verilməyib. Buna qədər plana düşən evlərin sahiblərinə hər kvadratmetrə görə 2 min manat civarında kompensasiya verilirdi.
Söküləcək binaların yerində yeni binaların tikiləcəyi gözlənilir.
